Skeppende Mense

20525476_10211455676722403_2920034379721567154_nDie kantmakers op Burano wat uitbundig lag, die matweefsters in Turkye en die borduur kringe op die markte in Boedapest het my aangegryp en byna jaloers laat voel.
Ek het nog altyd gedink dit is spesiaal om deel van ‘n skeppende groepie te wees waaruit soveel mooi dinge voortspruit. Nou is ek vir die eerste keer deel van ‘n kunsvlyt- en handwerkgroep – as deel van my werk om kleingroepe te vorm by die kerk. Dit is die lekkerste uitstappie om vir ‘n rukkie in daardie kring te sit en te werk aan ‘n projekkie. Daar is iemand wat kalligrafie doen, daar word gebrei, gehekel, borduur, inkleur, naaldwerk – enige handwerkie.

Elkeen se stokperdjie is ‘n kunsvorm wat al oor eeue heen beoefen word deur vriendskap sirkels. Ma’s en oumas wat benewens hul dagtaak, tyd maak vir iets moois. Elkeen se kuns materiaal inspireer my – die mooiste kleurkombinasies wol, skerp kleurpotlode in elke kleur van die reënboog. Ink wat so lekker ruik jy wil lostrek met ‘n sonnet en patrone so keurig jou vingers jeuk en jou kop begroot vir jou volgende inkopietog na die kunswinkel!

Maar dis nie die eindproduk – erfstukke, spog geskenkies of bederf goedjies wat so belangrik is nie. Dis die mense en die samesyn wat dit so kosbaar maak. Tussen al die lag en trane hoor ons elkeen se hart, deel elkeen haar storie, haar vrese en vreugdes. Op ‘n ongeforseerde en informele manier word wysheid tussen generasies oorgedra en terapie onwetend gegee.

Dit lyk my kreatiewe, vlytige mense het dikwels geduld en sagte oordeel. Ons ken immers van gekoekte bolle wol ontrafel en tydsaam uitryg waar ‘n steek geval het. Miskien is dit omdat ‘n mens konsentreer op jou werk, so jy luister noodwendig meer as wat jy praat. Ek sluit nie mans uit by hierdie kring nie, maar dit lyk vir my of iets wonderliks gebeur as ‘n groep vroue saamkom en iets aanpak. Jy hoef nie eens vaardig te wees nie, daar is genoeg gewillige leermeesters. Ek wil jou aanmoedig – vind of vorm jou eie kreatiewe kringetjie waarheen jy soms kan ontsnap.

Advertisements
This entry was posted in Uncategorized. Bookmark the permalink.

One Response to Skeppende Mense

  1. dromer777 says:

    Ek behoort nie aan n groep nie maar geniet my inkleur.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s